Sipas shifrave, në gjashtë muajt e parë të vitit ndërtimi, tregtia, industria përpunuese dhe bujqësia janë përballur me një përkeqësim të fortë në portofolin e kredive, të pashënuar ndonjëherë më parë.

Shifrat tregojnë se në ndërtim, kredia e keqe u rrit nga 32,3 për qind në fund të vitit 2012, në 53,2 për qind në qershor të këtij viti. Kjo do të thotë se, aktualisht, mbi gjysma e kredive totale, që bankat kanë dhënë për bizneset e ndërtimit, tashmë janë kredi, që nuk po shlyen rregullisht.

E njëjta tendencë është vënë re edhe në sektorin e tregtisë, ku kreditë e këqija u rritën nga 29,2 për qind në dhjetor, në mbi 46 për qind në gjashtë muajt e parë të këtij viti. Ndërsa në industri, shifra ka kërcyer nga 27,7 në fund të vitit të kaluar, në 44,6 për qind në gjashtëmujorin e parë.

Sipas të dhënave, për periudhën janar-qershor të këtij viti, kredia e keqe për gjithë ekonominë u rrit edhe me 100 milionë dollarë të tjera, duke arritur në mbi 1,4 miliardë dollarë në total. Pesha dërrmuese e saj i përket biznesit, i cili ka raportin më të keq të cilësisë.

Sipas të dhënave, nëse për individët kredia me probleme është 17,2 për qind e totalit, për biznesin shifra ka kërcyer në mbi 28,4 për qind. Kreditë e këqija janë, sipas Bankës së Shqipërisë, rreziku më i madh për qëndrueshmërinë e sistemit financiar në vend, i shndërruar dy vitet e fundit në shqetësim edhe për Fondin Monetar Ndërkombëtar dhe Bankën Botërore.

Dy institucionet e njohura të financave botërore priten që, shumë shpejt, të publikojnë një raport të hollësishëm mbi gjendjen e sistemit financiar në Shqipëri dhe rekomandimet përkatëse ndaj qeverisë për ta mbrojtur atë./ Top Channel

Për më shumë se 10 vende më lartë renditet Kosova kësaj radhe në raportin e Bankës Botërore (BB), për të bërit biznes. Burime të Kosovapress'it brenda Bankës Botërore bëjnë të ditur se, me gjithë përparimin në vitin e kaluar në këtë fushë, këtë vit renditja e Kosovës mund të arrijë në 15 vende më lartë.

Përparimi i Kosovës, në këtë indikator ka lënë prapa vendet e rajonit dhe disa vende të BE-së. Kosova, tani, është më mirë se Serbia, Shqipëria, Bosna dhe Hercegovina, por, gjithashtu, këtë vit e ka tejkaluar dhe Kroacinë, si vend i BE-së.

Burime të Kosovapress, bëjnë të ditur se suksesi më i madh i Kosovës, për këtë vit lidhet me reformat në fillimin dhe regjistrimin e biznesit (MTI) si dhe regjistrimin e pronës. Duke i parë të gjeturat e raportit, Kosova, këtë vit, për herë të parë në historinë e saj, hyn në top 10 vendet më reformatore në botë. Sukses ky që konsiderohet shumë i madh për një vend, që synon investime dhe ngritje ekonomike. Kosovapress ka kontaktuar ish-Ministren e Tregtisë dhe Indiustrisë, Mimoza Kusari- Llila, meqenëse raporti tregon se reformat më të shumta janë bërë pikërisht në fushën me të cilën Kusari-Lila ka menaxhuar si ministre.

“Nuk e di saktë në cilën pozitë jemi. Por, e di se një numër i konsiderueshëm i reformave tona janë marrë parasysh dhe do të kemi prapë ngritje”, ka thënë ajo.

Ajo thotë se ndjehet mirë që gjatë udhëheqjes së saj në këtë digaster, në dy vitet e fundit, ka arritur ta përmirësoj ambientin e biznesit, e me këtë edhe imazhin e Kosovës.

“Nëse është kështu siç thoni ju, ky sukses tregon se ndryshimi është i mundur, kur njerëzit e duhur me programin e duhur janë në pozitat e duhura”, ka thënë Kusari-Lila.

Ndryshe, vlerësimi i këtij raporti bazohet në 11 indikatorë: fillimi i biznesit, marrja e lejes për ndërtim, sigurimi i energjisë elektrike, regjistrimi i pronës, marrja e kredisë, mbrojtja e investitorëve, pagesa e taksave, zbatimi i kontratave, zgjedhja e pamundësisë së borxhit, tregtia përmes kufjeve dhe punësimi i punëtorëve./Kosovapress/

Ministri i Financave, Besim Beqaj duke marrë pjesë në hapjen e Fabrikës së Plehrave Artificial në Vushtrri tha se ky investim do të ndikojë drejtpërdrejt në rritjen e zhvillimit ekonomik, pasi rritë eksportin e këtyre produkteve që deri tani janë importuar, duke theksuar se Qeveria e Kosovës do t’i përkrahë të gjithë prodhuesit që krijojnë biznese dhe hapin vende të reja pune.
 
 Ministri Beqaj hapjen e Fabrikës “Hemo Agrokos “ e ka cilësuar të nivelit ndërkombëtar.

“Kjo fabrikë do t’i zgjerojë potencialet e eksportit. Fabrika si kjo do të ndihmojmë që të bëhen sa më të shpeshta që ekonomia të mbështetët sa më shumë në sektorin privat”, ka thënë ai.

Beqaj, me këtë rast, ka përmendur lehtësirat për bizneset që janë krijuar nga Qeveria e Kosovës. Kështu vendimi për heqjen e TVSH-së për produktet primare, sipas tij, ka prekur 20 mijë familje në Kosovë, duke ndihmuar shumë prodhues vendas.

Ministri i Financave ka shtuar se Kosova do ta ketë rritjen më të madhe ekonomike në nivel rajonal, duke e kaluar edhe 4 për qindëshin.

 Edhe ministri i Zhvillimit Ekonomik, Fadil Ismajli, e ka vlerësuar lart hapjen e kësaj fabrike. Sipas tij, ky investim nuk është vetëm për Vushtrrinë, por për krejt Kosovën.

 “Biznesi vendas përherë do ta këtë përkrahjen e Qeverisë. Jemi në biseda të vazhdueshme me BERZH-in dhe institucione të tjera financiare për mundësinë e marrjes së kredive të buta”, ka thënë Ismajli.

Nga ana tjetër, kryetari i Aleancës Kosovare të Bizneseve, Agim Shahini, tha se kjo fabrikë do të synojë jo vetëm tregun e Kosovës, por edhe më gjerë. Shahini ka thënë se vetëm duke prodhuar do të kemi rritje ekonomike.

Në këtë ceremoni morën pjesë dhe përfaqësuesi i Odës Ekonomike të Maqedonisë Veri Perendimore, Menderes Kuçi, dhe kryetari i Klubit të Biznesit të Ulqinit “Ana e Malit”, Kabil Kurti.  

Ata thanë se presin bashkëpunim mes bizneseve shqiptare këtej dhe andej kufirit.